【環保小知識】拜年必備！如何用環保攻略面對親戚「關心」攻勢！
農曆新年，面對親戚長輩一條又一條的「關心」，不少人都不知如何化解尷尬。除左扮覆message/去廚房拿飲品，還可以怎樣有禮貌地避過嚴刑拷問？Greenprice教路，當然要用環保攻略化險為夷，乘機推動環保！
- 「明仔，你返緊咩工啊？我個仔做銀行好好搵喎！」
三姑！我份工就正囉，唔單至入圍綠色企業大獎，平時公司工作環境夠哂環保，影印一定要雙面印刷，office唔夠人唔準開燈，收工一定會熄電制，仲鼓勵員工自備飯盒去買飯！黎黎黎，等我分享多啲綠色資訊你聽！
- 「明仔，幾時同你女朋友拉埋天窗，請我地去飲啊？」
(被割去魚鰭的鯊魚難以生存，網上圖片）
六婆！傳統婚宴大魚大肉，但往往賓客食到炸子雞已經飽哂食唔落，結果浪費大量食物。婚宴嘅魚翅更加係透過殘忍割走鯊魚鰭得黎！每當諗到呢到我就悲從中來，不過好彩其實香港已經有好多地方開始提供「環保魚翅」……六婆！你去邊啊？我未講完喎！
- 「明仔，你一個月畀幾錢家用屋企啊？」
四叔！實不相瞞，自從我地屋企實施「生產者責任制」要求屋企各人分擔屋企嘅唔同責任（買報紙錢、買樽裝飲品錢、買零食錢），再以經濟誘因推動屋企各持份者避免和減少製造污染（唔買多餘食物、唔睇紙報紙、回收賺零用錢），我地已經廢除左家用呢啲守舊嘅制度。
（新年食物最終造成浪費，網上圖片）
- 「明仔，無拖拍咩？好少見你黎拜年嫁喎？」
大伯！眼見宜家港人新年瘋狂買糕整糕，家家戶戶到初十都未食完屋企啲蘿蔔糕同年糕，最後等到食物過期只能夠扔去堆填區，我實在唔忍心啊！所以我決心今年化身「食糕使者」幫各位叔伯兄弟食糕！當然啦，大家適可而止，買夠食嘅數量就算就最好啦！
其實新年最重要也是一家用團團圓圓，長輩的提問也許讓人尷尬但也一種關心，既然如此無計可施的情況下， 便以環保攻略投桃報李吧！
